Məcnun Göyceli Seirleri

Son güncelleme:
  • Türk əsgəri

    Gurşad-gurşad sellənib,
    Şimşək-şimşək od alar.
    Qazi kimi yüksəlib,
    Şəhidlikdə ad alar.

    Bayraq ona boy verib,
    O, millətə yaraşır.
    Hər duruşu qala tək
    Əzəmətə yaraşır.

    Vətən eşqi çırpınar
    Ürəyində, canında.
    Türk dünyası hayqırıb,
    Coşar halal qanında.

    Sınar, Vətən yolunda
    İlk savaşa gəlməsə,
    Bilir, torpaq götürməz
    Ürəyindən ölməsə!

    Quranın ayəsidir
    Uluların öyüdü;
    Ay-ulduza hopubdu
    Əmdiyi ana südü.

    Qılıncıyla qaşıyıb
    Torpağın əzabını;
    O, açıb bu dünyaya
    Türklüyün kitabını.





    **************************************************
    KAMANÇA

    Qəməsi
    Kərəmin külündə
    Köksünə yol salıb!
    Habilin ürəyidi vallah!
    Dünyasından asılı qalıb.
    Açarsız aləmdə
    Zəmanəsi bəndə düşüb,
    bədləşən.
    Məğrurluğa kişiliyi
    kilidləşən!
    Mənliyinə, məsləkinə
    Haqsızlığın oxu süzən
    kişilərin
    İç harayı, iç səsidir
    kamança!
    Əsrlərin haqqa həsrət
    Fəryadıdır,
    Şah İsmayıl hikkəsidir
    kamança!
    Nənələrin qəm sığallı
    Hörüyündən bənd olubdu
    Sinəsinə ağ telləri!
    Şəhidlərin nakam-nakam
    Vətən ötən dilləri!
    İniltisi
    İnir-inir inildəyən
    Babəkimin
    Doğram-doğram qollarının
    Damar-damar sızıltısı!
    Ürəkləri göz yaşına
    çəkə-çəkə,
    Yerin-göyün nəşəsini
    Ələmlərə çökdürən ah!
    Sandığında sevgisinin ölümünə
    «Qara kağız» yasa batan!
    Qara yaylıq gəlinlərin
    Qarımayan hönkürtünün nəqarəti:
    «Of, Allah!»
    Təzə xalı:
    Şuşa adlı bir gözəlin
    Natəvana ağı deyən zümzüməsi!
    Xan əminin əsir düşən
    şikəstəsi!
    Qarabağın şikəst səsi!
    Xocalının ürəklərdə
    Şırım-şırım don bağlayan
    Kimsəsizlik üzüntüsü!
    Daş-torpağın qarış-qarış,
    Aha dönüb, ərşə qalxan
    Min ocağın, min tüstüsü!
    Köhnə xalı:
    Nəsiminin qürubundan
    qopan üsyan!
    «Ənəl-həqq»i damcı-damcı
    Xəncər-xəncər tarixlərə
    həkk edən qan!
    Ağlar zaman, yanar dövran!
    Aman Allah!
    Səfi göylərdə
    Ölüm qatarına düzülmüş,
    Mavi qaqqıltılı,
    Göz yaşları qanadına çırpınan
    qərib durnaların
    Harayı içimdə qanadı!
    Kamança
    Ana südü qoxumayan
    Nəvazişi sazaq-sazaq,
    çılpaq-çılpaq!
    Qınaq-qınaq!
    Danlaq-danlaq!
    Körpələr evinin
    Qocalmış dərdinə hopub,
    Qapısına övlad əli toxunmayan!
    Pəncərəsi xoş ovqata, mərhəmətə
    açılmayan
    qocalar evində,
    Sitəm-sitəm qəm oxuyan anadı!
    Kamança
    Qəriblik qoxuyan dünyada
    Qəriblərin tel-tel yanan,
    obasıdır, elidir!
    Şəhriyarın daş altında
    körpüləşən əlidir!
    Qurbaninin, Ağ Aşığın
    Fanilikdən şikayətkar dilidir!
    Kamança
    Göyçə deyib, sızıldayan
    Türklüyümün mərsiyəsi,
    Təziyəsi, ağısıdır!
    Dünya boyda diləyimin
    Vətən boyda yarasıdır!
    Kamança
    Zindanların qapısını
    ağladan!
    Haqsızlığa açılan
    Dəmir çarpayıların
    Dəmir yaddaşını
    yadan!
    Şər-böhtana boyun bükən
    Neçə-neçə günahsızın
    Puçur-puçur, pöhrə-pöhrə
    Arzusunu, diləyini
    Naləsiylə qanadan!
    Harda ötürsə, ötsün
    Dərdimizdən yuxarıdı kamança!
    Canımızda köklənibdi, elə bil
    Qanımızın axarıdı kamança!
    Babaların qəlyanında
    Ötən günü tüstülədə-tüstülədə,
    Nənələrə şərq dastanı söyləyir.
    Ələmin dizinə baş qoyub,
    Özünə neyləyir?
    Neyləyir, bizə eyləyir!



    ************************************************** **



    KİMİYƏM

    Bir az atam, bir az anam,
    Bir az da özüm kimiyəm.
    Dərdimin qanadı sınıb,
    Aləmdə sözüm kimiyəm.

    Qalib boyda zəfərsizəm!
    Səngərimdə nəfərsizəm!
    Yurda sarı səfərsizəm,
    Ocaqsız gözüm kimiyəm.

    Qarabağda vətən ölür!
    Ah yanır, aman tökülür.
    Papağım başıma gülür!!!
    Nizamsız düzüm kimiyəm.

    Məni məndə yoğurdular,
    Dil-ağızdan qovurdular,
    Qürbət boyu sovurdular!
    Birim yox, yüzüm kimiyəm.

    Tüstüm qalxır burum-burum,
    Hislənir əzmim, qürurum.
    Heykələ zarıyır xorum!
    Sınmış gündüzüm kimiyəm.

    Məcnun ömrü qəmdən alıb,
    Fərəhini bəndə salıb!
    Bir ünvansız gorum qalıb!
    Dözürəm,dözüm kimiyəm.
0 0 0
  • Ağrı dağı

    Bəy-paşa qamətli, sərdar duruşlu,
    Padişah simalı, xan oturuşlu,
    Kəklik qaqqıltılı, qartal vuruşlu -
    Nə gözəl bəzəyib yaz, Ağrı dağı.

    Bülbüllər boylandı gəlin çəmənnən,
    Qartallar qıy vurub danışdı mənnən.
    Doya bilmədim ki, ayrılam sənnən,
    Görüşün az oldu, az, Ağrı dağı.

    Zaman imtahana çox çəkdi məni,
    Saçıma dən saldı ayrılıq çəni.
    Sənə tapşırmışam anam Göyçəni! -
    Qəbrimi qoynunda qaz, Ağrı dağı.

    Bir də sən tərəfə düşəydi yönüm,
    Hicran alovluyam, mən necə sönüm?!
    Məcnun Göyçəliyəm, başına dönüm!
    Köklənib dərdimə saz, Ağrı dağı!
0 0 0