Futbol üzrə Unibank Premyer Liqasında XXIII tura bu gün keçirilmiş 2 oyunla yekun vurulub.
Lent.az-ın məlumatına görə, final mərhələsinin ilk turunun matçlarından biri ilk "6-lığ"a, digəri isə ikinci "6-lığ"a təsadüf edib.
"İnter" klubu çempionatın XXII turunda və ölkə kubokunun 1/4 final mərhələsinin ilk oyununda ardıcıl 2 dəfə məğlub etdiyi "Neftçi" ilə bu dəfə heç-heçə edib. "Şəfa" stadionunda keçirilən qarşılaşmada ilk yarının sonlarında Bronislav Çervenka meydan sahiblərini hesabda irəli çıxarıb. Oyun boyu fəal təsir bağışlayan "Neftçi" hesabı 77-ci dəqiqədə baş hakim Əfqan Həmzəyevin təyin etdiyi penalti zərbəsi ilə bərabərləşdirib. Adrian Neaqa Unibank Premyer Liqasında 10-cu, penalti ilə 6-cı qolunu vurub. Nəticədə rumıniyalı futbolçu bombardirlər sırasında liderliyini möhkəmlədib.
Bu heç-heçədən sonra turnir cədvəlinin ön pillələrində "ikihakimiyyətlilik" yaranıb. "Xəzər-Lənkəran"la "İnter" 1-2-ci, "Bakı" ilə "Qarabağ" isə 3-4-cü yerləri bölüşdürürlər. 5-ci pillədə qalmasına baxmayaraq, xallarını 12-yə çatdıran "Neftçi" 6-cı pillədəki "Qəbələ"dən 5 xal aralanıb.
İkinci "6-lıq"dakı oyunda isə "Turan" Tovuzda "Muğan"a uduzub. Amma bu nəticə "Turan"ın 9-cu, "Muğan"ın isə 10-cu pillədəki mövqeyini dəyişdirməyib.
12 mart (cümə)
"Bakı" - "Qarabağ" - 2:0
Silvinyo Joao De Karvalyo, 56. Fabio Luis Ramim, 76