Plastik qablardakı böyük təhlükə
Son güncelleme:
-
Plastik qabların zereri haqqında
Son dövrlər plastik qablardan istifadəyə tələbat xeyli artıb. İstehlakçılar bunu plastik qabların istifadə üçün rahat olması ilə izah edirlər. Mütəxəssislər isə plastik qablarda qida məhsullarının uzun müddət saxlanılmasının təhlükəli olduğunu bildirirlər.
ABŞ alimlərinin bildirdiklərinə görə, insan orqanizmində aşkar olunan toksik maddələrin 80%-i orqanizmə plastik qablar, tikinti materialları, mebel vasitəsilə daxil olur. Lakin insan orqanizmində olan toksik maddələrin əksəri plastik qabların payına düşür. Belə ki, plastik qablardakı toksik maddələr saxlanılan qida məhsullarının tərkibinə keçir, bu məhsulları yeyən insan da külli miqdarda toksik maddə qəbul edir. Tədqiqatlar nəticəsində ABŞ alimləri qənaətə gəliblər ki, müasir zamanda insanlar hər gün toksik maddə qəbul edirlər.
Sona Osmanova 7-8 ildir ki, məişət avadanlıqlarının satıldığı mağazada satıcı kimi çalışır. Onun sözlərinə görə, plastik qabları əsasən evdə işlətmək üçün qadınlar alırlar. Biz bu qablara saxlama qabları deyirik. Plastik qablarda dənli qida məhsulları, un, düyü, şəkər tozu, qənd, makaron saxlamaq olur. Bu qablar tez qırılmadığı üçün də alıcıları cəlb edir. Qablar əlvan rənglərinə, dizaynına görə də alıcıların xoşuna gəlir. Satışda plastik qabların çörək və ya qeyri-ərzaq məhsulları saxlamaq üçün də növləri var.
Bu qabların ziyanına gəlincə, müsahibimiz bununla bağlı hələ şikayət eşitmədiklərini deyir. S.Osmanova onu da bildirib ki, ərzaq məhsullarının satışı ilə məşğul olan bir sıra marketlər bu qablardan daha çox alır. Marketlərdən aldığımız xama, şor, turşu, konfet və s. kimi məhsullar plastik qablarda saxlanılır. Ola bilsin ki, onların az da olsa, ziyanı var. Amma buna ciddi yanaşan adamlar barmaqla sayılacaq qədər azdır.
Satıcı bildirib ki, bu qablar əsasən üç ölkədən - Türkiyədən, İrandan, Çindən - gətirilir. Ən zərərlisi Çindən gətirilən plastik qablar hesab olunur. Onların qiyməti də ucuzdur. Qabların özü də ucuz və keyfiyyətsiz materialdan hazırlanır. Ən çox alınan isə Türkiyə istehsalı olan plastik qablardır. Ən keyfiyyətli və bahalıları da onlar hesab olunur. Türkiyədən gətirilən plastik qabların çoxu şəffafdır ki, bu da alıcıların diqqətini çəkir. İrandan gətirilən qablar isə rəngli olur.
Satıcı onu da qeyd edib ki, istirahət yerlərində, bağ, dəniz kənarında birdəfəlik plastik qablardan istifadə etmək çox əlverişlidir.
İstehlakçı Fəzilə Əliyarovanın sözlərinə görə, plastik qablardan mətbəxdə geniş istifadə olunur. Salatların hazırlanması, meyvələrin, göyərtinin, dənli bitkilərin yuyulmasında plastik qablardan istifadə edirəm. Plastik qablarda yağ, pendir də saxlayıram. Bundan başqa, göyərti, meyvə, tərəvəzi də plastik lövhələrin üzərində kəsirəm. Bu qablar istifadədə rahat olduğu qədər mətbəxə də gözəllik verir. Rəngli, maraqlı rəsmlərlə bəzədilmiş bu qablar mətbəxdə iş görərkən insanın əhvalını da yaxşılaşdırır. Bu səbəbdən də onun zərərli olması da unudulur. Lakin mən plastik qab alarkən ehtiyatlı olmağa çalışıram.
O qeyd edib ki, ilk baxışdan plastik qablar bir-birinə oxşayır. Xarici görünüşünə görə bu qabların keyfiyyətini müəyyən etmək çətindir. Çox vaxt bu qabları qiymətinə, quruluşuna, ölçüsünə görə alırlar. Çalışıram ki, bahalı plastik qablar alım. Ona görə ki, ucuz plastik qablar keyfiyyətsiz, sağlamlıq üçün zərərli materialdan hazırlanır. Belə qablarda toksik maddələr çox olur. Eləcə də bu qabları alarkən iyinə fikir vermək lazımdır. Keyfiyyətli plastik qabların kəskin iyi olmur.
Terapevt Anar Əliyevin dediyinə görə, plastik qabların tərkibində toksik maddələr var. Toksik maddələr insan orqanizminə plastik qablardakı qida vasitəsilə daxil olub, tədricən onu zəiflədir, sağlamlığını təhlükə altına atır. Bu səbəbdən də plastik qablardan çox istifadə etmək olmaz, - deyən həmsöhbətimiz hesab edir ki, xüsusilə də bu qablara isti içki və ya xörək tökmək məsləhət deyil. Onun sözlərinə görə, plastik qablar möhkəm olsun deyə tərkibinə xüsusi möhkəmləndirici maddələr qatılır ki, bu bu maddələr də toksik maddələrin çoxalmasına səbəb olur. İsti çay və ya yeməyin belə qaba tökülməsi isə bu qablardan toksik birləşmələrin ayrılmasını sürətləndirir. Eləcə də plastik qablardan uzun müddət istifadə etmək olmaz. Köhnələn plastik qablardan ayrılan toksik maddələr daha qorxulu olur.
Dediyinə görə, toksik maddələrlə zəngin plastik şüşələr isə təkrar istifadə edildiyi üçün xüsusilə təhlükəli sayılıır. Bu gün bir çoxları plastik qabları küçədən yığıb və ya ilkin istifadədən sonra təkrar istifadə üçün saxlayırlar. Belə qablarda müxtəlif qida məhsulları, misal üçün, süd satılır ki, ondan da istifadə qorxulu fəsadlar verə bilər. Bu fəsadlar özünü qısa müddət ərzində göstərmir. Toksik maddələrin, xüsusilə də davamlı təsiri bir müddət sonra özünü göstərir. Bu gün məhz bir sıra müalicəsi çətin olan xəstəliklərin səbəbkarları da gündəlik istifadə olan əşyaların, vasitələrin tərkibdə olan toksik maddələrdir, - deyən terapevt bildirib ki, birdəfəlik qablarda toksik maddələrlə zəngin məişət əşyalarıdır. Lakin bu qablardan nadir hallarda istifadə etmək olar. Onların da istifadəsi zamanı müəyyən qaydalar gözlənilməlidir. Bu qablara da isti maye, qazlı sular əlavə etmək olmaz.
Alıntı..