yadındadı
küçəmizdən keçmə demişdin
mən də keçməmişdim.
keçməmişdim... keçmirəm də...
küçələri gəzən vaxtım çoxdan keçdi
çoxdan keçdi.
keçdi mənim üzdən gözdən saldığım
hər qıza bir nəğmə olan şeirlərim
qayğısız günlərimdən
istədiyin oldu...
indi sənə yazılır şeirlərimin çoxu.
bu yaz
özünü küləyə verən saçların kimi dəniz dalğalı
dəniz demişkən
yaz demişkən
düzünü deyəcəm
bir neçə şairdən yaxşı şeirlər oxudum
gülməli
ağlamalı
Vallah zarafat eləmirəm
düz deyəndə nə olar?
adamın Allahı olsun gərək Allahı.
Deyirəm birdən olmadı elə
oldu belə
geri dönsən neyləyərəm?
bilirsən
sənə şeir yazmaq o qədər gözəldir ki...
doğrusu geri dönməyini istəmərəm
səni belə çox sevirəm...
bir fincan yavaş-yavaş soyuyan çay
bir qutu şeir boyu əriyən siqaret
Bir də Şopendən həzin bir musiqi var-
e-minor başlanğıc.
gördüyün kimi alababat başımı qarışdırıram...
bu bir az məndən
de görüm sən necəsən?