1. Ana Sayfa
  2. Azərbaycan
  3. Nə var ki

Nə var ki

Son güncelleme: 21.04.2014 15:21
BiR-DOST BiR-DOST foto
  • Haqq haqq olsa, hər arxalı nadanın
    Gözü üstə qaş olmağa nə var ki!
    Vicdan sussa, ağlar gözün selində
    Gülə gülə yaş olmağa nə var ki!

    Ev tikmədik boz qamışdan, qarğıdan,
    Qıy ummadıq, yapalaqdan, qarğadan.
    Utanmasan qızılquşdan, qırğıdan,
    Toyuq kimi quş olmağa nə var ki!

    Əl sevinər əkdiyini biçəndə,
    Dil sevinər mərdlik andı içəndə,
    Başsız yerdə, başsızların içində
    Başa çıxıb baş olmağa nə var ki!

    Sinirlərim, əsəblərim bax, tarım!
    Kökdən düşüb, xaric ötür, ax, tarım!
    Mərd deyil ki, çıraq ilə axtarım,
    Namərdlərə tuş olmağa nə var ki!

    Bu dünyanı ayıq sayıq dolan,gəz,
    Şər güllələ, böhtan doğra, yalan kəs.
    Kişilikdən dəm vurunda filankəs
    Yerindəcə daş olmağa nə var ki!

    Müəllif: Ənvər Rza. 1983

    alıntı
#21.04.2014 15:21 0 0 0