1. Ana Sayfa
  2. Azərbaycan
  3. Yasəmənlər niyə belə gec açdı

Yasəmənlər niyə belə gec açdı

Son güncelleme: 08.05.2014 20:13
BiR-DOST BiR-DOST foto
  • Sevənlərə butası var bu yazın,
    Yasəmənlər niyə belə gec açdı.
    Elə bil ki, xatası var bu yazın,
    Yasəmənlər niyə belə gec açdı.

    Yaz yağışı yudu çölü-çəməni,
    Öz ömrünü başa vurdu səməni,
    Hansı çiçək uyudacaq, de, məni,
    Yasəmənlər niyə belə gec açdı.

    Çiçəklərin tez açanı, öncəsi,
    Ən kövrəyi, ən zərifi, incəsi,
    Sıralanıb tumurcuğu, qönçəsi,
    Yasəmənlər niyə belə gec açdı.

    Yaz yetişib bağçalara, bağlara,
    Nur qarışıb yaz nəfəsli çağlara.
    Çən-duman da köçün çəkdi dağlara,
    Yasəmənlər niyə belə gec açdı.

    Səhər-axşam izləyən var bu gülü,
    Hər bəladan gizləyən var bu gülü,
    Nə müddətdi gözləyən var bu gülü,
    Yasəmənlər niyə belə gec açdı.

    Dağda çoban vida dedi keçəyə,
    Salxım söyüd saçın töküb küçəyə,
    Alça, ərik bürünübdü çiçəyə,
    Yasəmənlər niyə belə gec açdı.

    Bahar gəlib xalısını toxuyur,
    Sal qayalar çəmən- çiçək qoxuyur.
    Qaranquş da nəğməsini oxuyur,
    Yasəmənlər niyə belə gec açdı.

    Yaz boylanır həm sağında, solunda,
    Tumurcuq var qanadında, qolunda,
    Gözüm qalıb yasəmənin yolunda,
    Yasəmənlər niyə belə gec açdı.

    Gələcəkdir, gəlişinə güman var,
    Daha yazdı, nə bir çən var, duman var.
    Bəlkə bilmir ondan vüsal uman var,
    Yasəmənlər niyə belə gec açdı.

    MÜƏLLİF:- VAQİF MƏMMƏDOV

    alıntı
#08.05.2014 20:13 0 0 0