Nədən özgəsini yar eylədin bəs
Son güncelleme:
-
Min il bundan əvvəl qisməti, yarı,
Mən idim könlünün, yada sal barı...
Demişdin, baxmaram özgəyə sarı,
Nədən özgəsini yar eylədin bəs?
Bu yeni həyatda görüşdük yenə,
İndi sən özgənin, özgəyəm sənə,
Sən ki, deyəcəkdin “sevgilim”mənə,
Nədən özgəsini yar eylədin bəs?
O vaxtdan keçsə də əsrlər, illər,
Dünyadan köçsə də neçə nəsillər,
Tapdı yarısını sevən könüllər,
Nədən özgəsini yar eylədin bəs?
Ötənlər yaddaşdan silinməz demə,
Yadımda xatirən edir zümzümə,
Deyirdin, tək sənsən həmdəm ömrümə,
Nədən özgəsini yar eylədin bəs?
Deyirdin alnımın qırışındasan,
Gözümün boylanan baxışındasan,
Sən mənim bəxtimin naxışındasan,
Nədən özgəsini yar eylədin bəs?
Hər axşam yananda göy ulduz-ulduz,
Deyirsən, yuxuma gəlirsən tez-tez,
Mənəmsə yuxuda gördüyün o qız,
Nədən özgəsini yar eylədin bəs?
İndi söyləyirsən, əzəldən birik,
Olaq bir günaha ikimiz şərik,
Ümidin vardısa biz görüşərik,
Nədən özgəsini yar eylədin bəs?
Sən məndən özgəni sevəcəkdinsə,
Məni özgəsinə verəcəkdinsə,
Qayıdıb könlümə girəcəkdinsə,
Nədən özgəsini yar eylədin bəs?
Oynatma könlümü yerindən belə,
Nə, uşaq deyiləm tutasan dilə,
Gəl indi cavab ver, sən Dəstəgülə,
Nədən özgəsini yar eylədin bəs?
alıntı