Xəlil Adıgözəl - Yaşadım yarımçıq, öldüm yarımçıq
Son güncelleme:
-
Dedik addımlayaq bu uzun yolu,
Bəs niyə qoyursan yarıda məni ?
Dostlar da vəfasız, yar da vəfasız,
Görmədim birisi yarıda məni.
Geriyə boylanıb gördüm ki, artıq
Ömrümün yarısı yetibdi, gülüm !
İstədim qəlbimin yarısın verim,
Gördüm ki, hamısı bitibdi, gülüm !
Daha gül bənizin saralıb-solmaz,
Payız yarpağının sarısı kimi.
Ömür yollarıma işıq saçmadın,
Ayın parçalanmış yarısı kimi.
Bu nə cür taledi, bu nə cür yazı ?
Niyə hər şeyimi böldüm yarımçıq ?
De, indi mən kimə şikayət edim...?
Yaşadım yarımçıq, öldüm yarımçıq.
Ayrılıq dediyin nədir ki, gülüm,
Bir üzü təbəssüm, bir üzü kədər.
Deyirəm, kaş sən də məni sevərdin,
Səni sevdiyimin yarısı qədər...
Müəllif: Xəlil Adıgözəl