Getmə
Son güncelleme:
-
Sinəmin üstündə ocaq qalama,
Yox demə, yad olma, baş yırğalama.
Dön bax uçurduğun ümid qalama,
Getmə.
Fırlancağa döndü dünya başımda,
Uşağa çevrildim ahıl yaşımda,
Bax, sənə yalvarır göz də,yaşım da,
Getmə.
Bilirsən ki,dayanacaq nəfəsim,
Can zindan olacaq, dünya qəfəsim.
Dinlə nə qədər ki, çıxır kal səsim,
Getmə.
Eşqini dağ bildim, səni məlhəmim,
Düşündüm yoxluğa çəkilər qəmim,
Sevgim də həmindir,özüm də, həmin,
Getmə.
Boş qəlblə öləcəm, heç dolmayacam
Daha məhəbbətə saç yolmayacam,
Sən peşman olanda, mən olmayacam,
Getmə.
Asandırmı, həyatımı bitirmək?
Sevgimizi göydən yerə gətirmək?
Ən böyük qorxumdur, səni itirmək,
Getmə.
Demə hədiyyənmiş, təklik, ahu-zar.
Haqq yazmayan bəxti mənə kim yazar?
Rəhimlini sənə qaytarmaz məzar,
Getmə.
Müəllif: Aygun Rehimli
alıntı