1. Ana Sayfa
  2. Azərbaycan
  3. Xəlil Adıgözəl - Bir sözün əhvalatı...

Xəlil Adıgözəl - Bir sözün əhvalatı...

Son güncelleme: 19.10.2016 09:16
Sbela Sbela foto
  • Bir sözün əhvalatı... (Yeni)

    Öz yolumun yolçusuydum,
    İz atdılar ayağıma.
    Düz yolumun yolçusuydum,
    Söz atdılar ayağıma.

    Baxdım ki, suç-günahına...
    Batılası söz deyil bu!
    Hər adamın ayağına,
    Atılası söz deyil bu.

    Dərindən bir köks ötürüb,
    Deyəsi oldum o sözü.
    Əyilib yerdən götürüb,
    Yiyəsi oldum o sözün.

    Yanıb-yanıb külə döndüm,
    Tüstümə götürdüm sözü.
    Hamının gözü önündə,
    Üstümə götürdüm sözü.

    Əlindən tutub qaldırdım,
    Göz yaşını tumarladım.
    Bir az saçların oxşadım,
    Bir az başın tumarladım.

    Öldüm, ölümdən qayıtdım,
    Düz sözümdən ayırmadım.
    Doğma sözümtək böyütdüm,
    Öz sözümdən ayırmadım.

    İllər ötdü, bir şeirin,
    Gözünə qatdım o sözü.
    Saf, tərtəmiz, dürr şeirin,
    Sözünə qatdım o sözü.

    ...oxudum "söz atanlara"
    Sehrinə daldılar sözün.
    Üstündə dura bilməyib,
    Altında qaldılar sözün.

    Xəlil Adıgözəl
#19.10.2016 09:16 0 0 0