1. Ana Sayfa
  2. Azərbaycan
  3. Həyat yoldaşınızı tanımaq üçün iki əsas xüsusiyyət-sevgi dili və zəka

Həyat yoldaşınızı tanımaq üçün iki əsas xüsusiyyət-sevgi dili və zəka

Son güncelleme: 27.11.2009 01:39
Leyl-i Lal Leyl-i Lal foto
  • Hər bir insanın xarakteri müxtəlif olduğu kimi sevgi dili də müxtəlifdir. Sevgi dili isə bir-birimizə sevgimizi ifadə edərkən istifadə etdiyimiz üsuldur.

    Sevgi dillərinin sayı əsasən beşdir:
    1. Xidmət,
    2. Xoş söz,
    3. Asudə vaxt,
    4. Fiziki təmas,
    5. Hədiyyə.

    Əgər bu maddələri misallarla izah etmiş olsaq, yemək bişirmək bir sevgi ifadəsidir. Bir şeyi bəyəndiyini demək sevgidən irəli gəlir. Bir-biri ilə xoş vaxt keçirmək ancaq sevgi ilə mümkündür. Həyat yoldaşınızın əlini tutmaq sizin ona sevginizi göstərir. Gül almaq sevgini ifadə etmək üçün başqa bir formadır...
    Bəs görəsən, həyat yoldaşınız bu beş sevgi dilindən daha çox hansına yaxındır? Çünki hər sevgi dilinin öz yeri olsa da, hər insan üçün ancaq bunlardan biri əsasdır. Buna görə də əgər həyat yoldaşınızın daha çox xoş sözə ehtiyacı varsa, məsələni gül almaqla həll etmək istədiyiniz nəticəni verməyə bilər. Çünki o güldən çox, sizdən xoş söz gözləyir. Başqa sözlə, həyat yoldaşınızın sevgi dilini kəşf etsəniz, özünüzü "boş yerə yormaqdan da" xilas etmiş olarsınız. Təbii ki, bu beş sevgi dilinin beşinə qarşı həssas olan tərəflər də az deyil. Əgər belə bir həyat yoldaşınız varsa, deməli, işiniz çox çətindir. Ancaq yenə də narahat olmağa ehtiyac yoxdur. Çünki sağlam dialoq və qarşılıqlı anlaşma ilə ortaq məxrəcə gələ bilərsiniz.

    Həyat yoldaşınızın zəka növünü bilirsinizmi?

    Bəs həyat yoldaşınızın hansı zəka növünə malik olduğunu bilirsinizmi? Zəka dedikdə ağlımıza həmişə riyazi zəka və ya başqa sözlə, möhkəm yaddaş gəlir. Əgər bir uşağın riyazi potensialı güclüdürsə, onun zəkalı olduğuna inanırıq. Çox danışan və çox hərəkət edən uşağın isə o qədər də zəkalı olduğunu düşünmürük. Sakitliyi və hərəkətsizliyi ağıllılıq kimi qələmə verdiyimiz üçün çox danışan və çox hərəkət edən uşağa da daha çox bunu məsləhət görürük. Halbuki, çox danışan uşaq "nitq zəkasına", çox hərəkət edən uşaq isə "fiziki zəka"ya malikdir. Təbii olaraq bu uşaqların birindən yaxşı bir natiq, o birindən isə yaxşı bir idmançı yetişə bilər. Bir sözlə, zəka təkcə riyazi potensialdan və ya möhkəm yaddaşdan ibarət deyil. Üstəlik bu təkcə uşaqlara aid deyil. Məsələn, həyat yoldaşınız insanlarla ünsiyyətdə daha bacarıqlıdırdsa, deməli o "sosial zəka"ya malikdir. Bundan başqa, musiqi zəkası, fərdi zəka, vizual zəka kimi başqa zəka növləri də var. Sizin üzərinizə düşən əsas vəzifə həyat yoldaşınızın hansı zəka növünə malik olduğunu kəşf etmək və münasibətlərinizi buna görə nizamlamaqdır. Bir sözlə, zəkası olmayan insan yoxdur. Sadəcə olaraq, zəkalar müxtəlifdir.

    Qaynaq:Ailəm Jurnalı, Bakı, Azərbaycan
#27.11.2009 01:39 0 0 0