1. Ana Sayfa
  2. Azərbaycan
  3. Qorqud tənəsi

Qorqud tənəsi

Son güncelleme: 21.04.2014 15:16
BiR-DOST BiR-DOST foto
  • - Adın nədir, qəşəng bala?
    - Qərib.
    - Qərib?
    - Bəli, Qərib! Xeyir ola?
    - Kim bu adı qoyub sənə?
    - Atam-anam.
    - Haralısan?
    - Bu kənddənəm, obadanam.
    - Atan, anan haralıdır?
    - İkisi də buralıdır.
    - Adın niyə Qərib olsun
    Onda quzum?
    - Qəribədir də, necə deyim,
    Necə yozum?
    On yaşım var.
    Bir də ki mən tək deyiləm,
    Kəndimizdə
    Çoxlu-çoxlu adaşım var.
    - Nahaq yerə.
    Axı qərib deyilsən sən.
    - Yox Qəribəm. Atam canı,
    Anam canı...
    Danışdıqca aşıb-daşır
    Bir uşağın həyacanı.
    Bu vaxt kimsə haray çəkir.
    Qərib! Qərib - deyə-deyə.
    Qərib mənə “Sağ ol!” – deyir,
    Qərib dönür bir şimşəyə.
    Adın niyə Qərib olsun
    Ay bu elin oğul barı,
    Vətənimin, ay sabahkı
    Qoruqçusu, xilaskarı?!
    Bizdən küsüb, inciməzmi
    Bu doğma yurd, ana torpaq?
    Ataların, anaların
    Qoyduqları ada bir bax!
    Əsrlərin arxasından
    Tənələsin Qorqud Dədə
    Qoy onları.
    Tənələsin öz yurdunda
    Övladına “Qərib” adı
    Qoyanları.

    Müəllif: Ənvər Rza. 1982

    alıntı
#21.04.2014 15:16 0 0 0